''Divêt Kurd ti carî van gotinên bav û kalên me ji bîr nekin, “Neyarên bavan nabin dostên lawan” Kirinên Tirkan li hemberî gelê Kurd aqilê mirovan disekinîne.''

Dewleta Tirk li hemberî gelê Kurd helwesta xwe na guherîne, wisa pijiyiye di ser de jî Kurdan dike berpirsiyarê neçareseriyê. Tirk ji guhertinê tiştekî tenê dizanin, ew jî ew e ku divêt her kes bibe wekî wan û ji dewleta Kemalîzimê û leşkeran re xizmetê bike.

Bê guman dewleta Tirk li hemberî gelê Kurd bi niyeta xwe ya bi kirêt bi ser neket, lê mixabin di pê ewqas bedelên mezin, ewqas şehîd û keda bi mîlyonan Kurd jî heta niha xwe negihandin armancên xwe yên rewa. Tirkan beşek ji desthilatdarên tevegera Kurd li Bakur xistine bin kontirola xwe û tevgera Kurd lewitandin. Heger tevgera Kurd nehata lewitandin, kesên wek Aysel Tugluk û yên wek wê nikaribûn bi paraşûtan ji ezman werin bibin desthilatdar û zimanê xwe li ser Kurdan dirêj bikin, Kemalîzimê û peymannameya, sondxwarina (Misak-i Milli) biparêze û hestiyariyên Kurdan birîndar bike. Tiştên Aysel Tugluk dibêje dûrî ehlaqê mirova ye. Aysel Tugluk ji bo qatîlê Kurdan yê herî mezin Mistefa Kemal di rojnama Tirk Radîkalê de (28.05.2007) wiha dibêje “Helwesta wî ya dîrokî mezinbûna wî xwe nîşan da û hîn jî xwe nîşan dide. Ew kesekî ebedî ye. Ew ji bo netewbûnê bingehek e.”

Aysel Tugluk û kesên wek wê dê ji bo van xerabiyan bi gelê Kurd re di dîroka Kurdan de wek lekeya dîrokî bimînin. Mixabin tevgera Kurd li Bakur hê jî xwe ji siyaseta lewitanidinê xelas nekiriye, wê bi îsrar diparêze. Di ser de jî kesên wek Aysel Tugluk li Amedê di rêza yekem de bi Xelat dikin, wê dikin namzetê serbixwe. Ev helwesta li hemberî gelê Kurd bê rûmetî ye, ji neyarên Kurdan re xizmet e. DTP bi Aysel Tugluk re li ser tevgera Kurd kapan diavêje û mirov dibêje qey tevgera Kurd û gelê Kurd milkê bavê wan e, ku ew li ser Kurdan ewqas lîstikan çê dikin. Gelo qet kesekî bi fam û feraset di nava desthilatdarên DTPê de tine ku bizanibe dewleta kûr wan bi çi sosiretî bi kar tîne? Madem ku Aysel Tugluk û yên wek wê Kemalîzimê û Misak-i Milli û Mistefa Kemal diparêzin, dikin serokê xwe yê ebedî çima hatine ketine nava Kurdan û bi navê Kurdan diaxivin. Bila ji kerema xwe herin nava faşîst û şovenîstên Tirkan kar bikin, ku Kurd jî rûyê wan yên rûreş nas bike.

Divêt Kurd ti carî van gotinên bav û kalên me ji bîr nekin, “Neyarên bavan nabin dostên lawan” Kirinên Tirkan li hemberî gelê Kurd aqilê mirovan disekinîne. Gotinek pêşiyên Tirkan heye û dibêjin “Bir dil bir insan” (Zimanek miroveke) yanê bi dîtina Tirkan kî zimanekî bizanibe miroveke, kî du zimana bizanibe du mirov e û hwd. Lê van gotinên Tirkan li cem Tirkan ji bona Kurdan derbas nabe, çimkî Tirk Kurdan wek mirov nas nakin. De hela bala xwe bidinê çima serokê şaredarê Sûra Amedê Abdullah Demirbaş ji zimanê Kurdî re xizmetên baş dikir, dadigeha bilind ya Tirkan di 14ê vê mehê de ew û endamên meclîsa Sûrê ji karê wan avêt. Goya dadigeha Tirkan ya bilind di biryara xwe de wiha dinivîsîne ”Seroke Şaredariya Surê Abdullah Demirbaş, biryara şaredariyeke pirzimanî daye. Ev biryara pirzimanî ya şaredariyê li dij qanunên Tirkiyê ye, li dij qanûna bingehîn a Tirkiyê ye û Tirkiyê perçe dike.

” Çavkanî malpera, http://www.netkurd.com/nuce.asp?id=7609

Divêt Kurd ti carî bi gotinên vala û bê bingeh, ku bi salane ji aliyên pir Kurdan ve jî tê gotin, ku goya Kurd û Tirk biran e bawer nekin. Biratî bi qirkirina gelê Kurd, bi şovenîzmê, faşîzmê, asîmîlasyon û înkariyan nabe. Biratî bi çirto û virtotî nabe.

Divêt Kurd jî êdî aqilê xwe topî serê xwe bikin, dengên xwe bi xurtî bilind bikin, ji bo mafên xwe, li dijî qedexebûna zimanê xwe bi girseyî derên meydanan û hilbijartinên Tirkan boykot bikin, nehêlin Kemalîstên eşkere û yên veşartî bi navê Kurdan biaxivin.